Hörmətli həmkarlar!
Azərbaycan Ağız və Üz-Çənə Cərrahları Cəmiyyətinin (AzOMFS) Sədri olaraq Sizi, 12-14 oktyabr 2023-ci il tarixlərində Ulu Öndər Heydər Əliyevin 100 illiyinə həsr edilmiş II Beynəlxalq Elmi-Praktiki Konqresimizə dəvət edirəm.
Sizin dəstəyiniz və yaxında iştirakınızla 2019-cu ildə keçirilən bizim 1-ci Beynəlxalq Konqresimizdə 17 ölkədən 500-ə yaxın iştirakçı qatılmışdırsa, Ulu öndər Heydər Əliyevin 100 illiyinə həsr olunmuş hazırki 2-ci Beynəxalq Konqresimizə Avropa ölkələri, region dövlətləri, eləcə də Amerika və Asiya ölkələrinin mütəxəssisləri də daxil olmaqla, bizimlə öz bilik və təcrübələrini bölüşmək üçün 30-a yaxın ölkədən 50-dən çox dünya səviyyəsində ən nüfuzlu məruzəçinin və 1000 nəfərə qədər iştirakçıların qatılacağı gözlənilir.
Avropa Kəllə Üz-Çənə Cərrahları Cəmiyyəti (EACMFS) Konqresə öz elmi dəstəyini verərək, tədbirə sahəmizin dünya səviyyəsində ən nüfuzlu mütəxəssislərini cəlb edir və onlar öz bilik və təcrübələrini bizimlə bölüşəcəklər. Bununla yanaşı Beynəlxalq Ağız və Üz-Çənə Cərrahlarının Assosiasiyası, Konqresimizin zəngin elmi proqramını təsdiqləyərək bu ilin ən mühüm beynəlxalq tədbiri kimi tanıdığını bildirib. Ölkəmizin ən iri və ultramüasir məkanı olan Bakı Konqres Mərkəzində keçiriləcək tədbirin 3 günlük Elmi Proqramına - plenar çıxışlar, simpoziumlar, sərbəst prezentasiyalar, poster təqdimatları, master-klaslar daxil edilib. Konqres günlərində ayrıca Diş implantasiyası və ixtisasımıza yaxın - Üzün plastika və rekonstruksiya cərrahiyyəsi, Baş-boyun cərrahiyyəsi və onkologiyası, Kosmetologiya məsələlərinə aid Simpoziumlar keçiriləcək. Gələcək nəslin inkişafı da diqqət mərkəzində olacaq, belə ki burada gənc mütəxəssislərin konfransı təşkil olunacaq. Konqres keçirilən məkanda tibbin ən son nailiyyətləri və xidmətlərini nümayiş etdirən Beynəlxalq Sərgi təşkil olunacaq.
Konqresin tibbi əhəmiyyəti ilə yanaşı belə bir tədbirin beynəlxalq aləmdə Azərbaycanın nüfuzunun daha da yüksəldilməsinə xidmət edəcəyinə əminik. Bu tədbirin keçirilməsində müvafiq dövlət strukturlarının razılığını və Azərbaycan Respublikası Səhiyyə Nazirliyinin, eləcə də digər aidiyyatlı qurumların dəstəyini almışıq.
Konqresin qonaqları ilə birlikdə Sizi zəngin Sosial Proqrama qatılmağa çağırıram. Proqramda qədim Bakının görkəmli yerləri ilə yanaşı Respublikanın regionlarına da (Şuşa daxil olmaqla) səfərlərimiz nəzərdə tutulur. Konqresimizin şüarı “Əməkdaşlıq sərhədlərimizi genişləndirək” yolunda ixtisasımızın inkişafı naminə öz töhfələrini vermək və yeni nailiyyətlərini bölüşmək, eləcə də öz peşəkarlıq səviyyəsini artırmaq istəyən hər bir həmkarımızın bu elmi forumda fəal iştirak edəcəyinə ümid edirik.